Advent

Advent  - die begin
Advent kom van die Latynse woord adventus af, wat met “begin” of “koms” vertaal kan word. Vir ons as gelowiges, is dit die begin van die Kerkjaar. Dis die paar weke voor Kersfees, waar ons gereed maak om Jesus – God met ons – se geboorte vier, maar ook mekaar herinner aan ons afwagting op Jesus se wederkoms. ‘n Paar eeue voor Jesus se geboorte, het die profeet Jesaja sy generasie se afwagting en eintlik ’n desperaatheid verwoord. Sy gebed in Jesaja 9 het my daaraan herinner dat ons in hierdie komende seisoen dalk ook met meer as net afwagting sit. Dalk selfs ‘n bietjie desperaatheid:

Want vir ons is ‘n kind gebore, ‘n Seun is vir ons gegee:
Vir almal van ons
Die weeskind en weduwee
Die hawelose en verslaafde
Die depressie en diabetes lyer.

Vir ons die hoofleier en detensie bywoner
Die oorweldigde enkelouer en kinderlose
Die professionele industrieleier basiese bloukraagwerker

Vir elkeen van ons is die Seun gegee.

Die seun het ‘n geheime rewolusie begin.
Sonder om ‘n skoot te skiet of swaard te trek
Sonder verkiesingstruuks of slagspreuke
Word hy die Koning.

Met titels soos
Wonderskone wysheid
Koning van vrede
Vader.

Hy word die God wat regmaak
Hy word die God met vuil hande
Hy word die God wat gespot word
Hy word die God by ons.

Ons is desperaat vir die dag wanneer Hy
Nasionalisme neutraliseer
Kru kapitalisme kanselleer

Ons is desperaat vir die dag wanneer Hy
Onvolmaakte gebede verhoor
Misdadigers en staatskapers laat verloor

Ons is desperaat vir die dag wat Hy
Die laastes eerste laat staan
Hartseer en trane finaal laat vergaan.

Want, ‘n kind is vir ons gebore
‘n Seun is vir ons gegee
Vir elkeen van ons
‘n nuwe begin, ‘n nuwe môre.

Brood

‘n Goeie vriend van my het ’n tiener seun. Die meeste van ons weet dat die gemiddelde tiener seun soveel eet as wat ‘n vol gelaaide Boeing 777 brand-stof gebruik om op te styg. Die vriend se daaglikse brood-begroting behels basies een-en-‘n-halwe brood vir sy seun en dan omtrent ‘n halwe brood vir die res van die gesin. 

Brood is wêreldwyd in verskillende gedaantes ‘n stapelvoedsel, want dis eenvoudig en taamlik vullend. Wanneer Jesus ons leer bid “gee ons vandag ons daaglikse brood” sal die gemiddelde mens maklik verstaan dat dit oor kos gaan wat ons nodig het en ons basiese oorlewing.

In die Matteus-evangelie, nog voordat Jesus mense leer bid, sien ons dat Jesus vir ‘n ruk lank sonder daaglikse brood geleef het. “Daarop het die Gees Jesus die woestyn ingelei om deur die duiwel versoek te word. Nadat Hy vir 40 dae en 40 nagte gevas het, het Hy naderhand baie honger begin word. Toe kom die versoeker na Hom toe en sê vir Hom: “As jy dan die Seun van God is, beveel hierdie klippe om brode te word.” Maar Jesus het hom geantwoord: “Nee! Daar staan in die Skrif geskryf: ‘’n Mens het meer as brood nodig om van te lewe. Wat jy eintlik nodig het, is om te leef van elke woord uit God se mond.’” (MATTEUS 4:1‭-‬4 NLV) ‬

Elke woord van God is meer noodsaaklik as brood.

Navorsing wat ’n paar jaar gelede deur e-kerk gedoen is, het gewys dat omtrent twee derdes van gelowige Afrikaanse mense minder as een keer per week Bybel lees. Wanneer hulle wel Bybel lees, is dit een vers en gewoonlik uit ‘n Bybeldagboek. Hoe sal ons lyk as ons een maal per week een sny brood eet en niks anders nie?

Ons het ook agter gekom dat wanneer mense die Bybel lees, word dit soos ‘n woordeboek of ‘n naslaan boek gebruik. Ons soek een van die volgende goed in die Bybel:
• ‘n versie vir motivering of aanmoediging
• ‘n versie om ‘n morele beginsel te onderstreep
• ‘n versie om ‘n argument te vorm

Ons gebruik dus die Bybel as ‘n stuk gereedskap. Dis soos om ‘n ou stuk droë brood te gebruik as ‘n hamer; of ‘n uitgedroogte sny brood vir ‘n dakteël; of natgemaakte brood vir stopverf. Dit kan werk, maar dis nie waarvoor dit gemaak is nie.

Ons het die Woord van God nodig om ons daagliks te voed, soos brood. Soms eet ons dit sommer gou in die hardloop oppad skool of werk toe. Soms eet ons ‘n broodjie vir pouse of teetyd. Brood kan soms ‘n hele ete wees. Dis egter ‘n daaglikse stapelvoedsel.

Jesus leer in Johannes 6:33, 35 dat hyself die brood is wat lewe gee. “Die brood van God is Hy wat uit die hemel kom en aan die mensheid lewe gee... Ek is die brood wat lewe gee. Wie na My toe kom, sal nooit weer honger word nie; en wie op My vertrou, sal nooit weer dors kry nie...”

Wie weet, miskien sal ons minder debat onder gelowiges sien wanneer ons mekaar minder met droë brode gooi. Miskien werk ons land steeds, ten spyte van die regering omdat daar mense is wat daagliks van elke woord van God leef en daaruit krag en ywer en hoop kry vir die lewe.

Praktiese uitnodiging: Sit vir elkeen in die huis, wat ‘n kosblik kry ‘n “briefie” met die Bybel app se vers vir die dag saam met hul kos. Lees die teks uit Sondag se preek, hierdie week by elke ete wat die huishouding saam eet uit verskillende vertalings.